Day 3 - 金坑梯田

一早起身, 我地就一早響樓下寄存行李, 因為去睇梯田係要行山, 我地唔可以帶咁多行李.... 但係呢間野要俾寄存行李費.... 算啦... 都要俾...

出發去梯田~
去對面桂林站搵訂左既旅遊車先~

搭左兩個幾鐘車, 終於到龍脊梯田附近.... 我仲買到學生飛... 唔知張學生證可以厚面皮咁用到幾時呢??! 哈哈~

過左買飛閘口, 仲有好大段車程, 都唔知搭左幾耐, 終於落車.... 見到一大堆女人圍住要幫我地拎行李...

個個都好似阿婆咁, 俾佢拎好似蝦阿婆咁..... 我地開頭冇俾, 但係有一個阿婆一路跟住我地, 唔走... 仲自動減價... 我地最終都俾左佢拎, 不過我地都俾返原價.... 當幫下阿婆啦... 我地其實係拎到, 唔駛人地幫我地揹上山架...

金坑梯田

我地去既原來係叫金坑梯田, 應該係呢度最大範圍既梯田, 我地住半山既田頭寨, 要響山腳行九個字先上到去... 沿路好多梯田呀~ 真係好多~

沿路都有好多我地覺得好得意既野, 影左好多相~

呢度好靚~ 全部都係梯田.... 真係除了梯田, 還是梯田.... 一片綠悠悠, 好舒服~ 

去到住宿既地方, 拎左房就入去... 我一入去就聞到一陣味... 林小姐話係木味, 焗得耐所以有味, 開窗散下就冇野.... 咁我就入房.... 但係真係好唔對路, 因為我覺得唔係木味.... 點知唔搵由自可, 一搵就大鑊.... 我一行我近廁所就見到有一大堆野未沖... 我即刻彈左出房大叫.... 點住呀??!! 真係好大陣味, 唔散架.....

我唯有落去換房.... 終於有間住得既.... settle down 左之後, 我地諗住出去行下.... 響樓下見到有電腦, 就多口問下係咪有得上網啦... 點知佢話有wifi.... 有wifi??!!!! 呢d 鄉下地方有wifi??!! 勁!! 我真係估你唔到.... 因為要輕便行李, 我冇拎netbook, 只可以用電話whatsapp... 但係我冇拎電話既叉電機黎...
我地plan 響度留3日, 咁每日只可以用33%電... 好彩叉爆左先上黎0者....


金佛頂~

出去行左一陣, 都冇咩好食, 就返去住既地方食野.... 呢度冇咩好食, 同埋都幾貴, 冇計, 佢地全部都係獨市, 賣幾錢你都要食架啦.....

兩只蝗蟲好快就清晒咁多碟......

食完就去景點睇日落~ 呢個景點叫金佛頂~ 因為呢日天陰陰, 都應該冇咩睇架喇... 雖然冇咩太陽, 但係梯田真係好靚~ 一大片綠悠悠, 見到都心曠神怡呀~

上去金佛頂既路程都好崎嶇... 因為佢地唔多路牌, 又唔多人可以俾你問路... 咁我地咪亂行囉... 見到分岔路, 行第一條岔, 唔對路就返轉頭行第二條.... 就係咁, 我地行左好多路.... 試左好多唔同既分岔路..... 哈哈... 我地有度好, 雖然會迷路, 但係我地唔怕行... 最多咪行多d 路~ 難唔到我地既~ hehee~

上到去已經有唔少人響度等日落~ 我地都響度等.... 係咁影相, 影出黎既全部都係梯田, 真係唔同角度影出黎, 全部都唔同...
不過今日天氣唔好, 其實都唔係好睇到日落.....

入黑前要返歸~

由於呢個山頭係唔會有街燈, 我地一定要帶電筒同埋盡量要入黑前返去.... 就係咁, 我地都要返去食飯~ 順便同住宿既老闆講book 車聽日去第二度睇梯田~

我地夜晚食竹筒飯, 飲水酒~ 好好味~

Day 2 - 桂林

到左桂林...
就係咁, 我響車度訓, 訓到司機叫到站... 睜開眼, 個天仲係黑, 佢真係冇昆我, 真係會半夜4點幾5點到桂林.... 我地就係咁, 一人拖住一個0急, 響車站買左張桂林市地圖, 就黑住咁響街遊盪....

沿路都好多人問我地去邊, 要唔要車... 我都唔知自己去邊, 點答你喎... ai.. 就係咁, 我地拖住個0急行黎行去, 行左一陣之後, 我地醒覺, 我地要搵住宿, 放低個0急.... 咁我地沿路見到住宿就問, 點知差唔多全部都冇房, 一唔係就貴.... 我地行左好一陣子, 搵到一間ok既, arm arm 有人退房, 不過因為清潔阿姐未開工, 未執房.... 所以我地放左個0急上去, 周圍乜都唔敢掂, 就出去行一陣, 因為天都開始光.... 搵d 野食都好丫....

 我地住既酒店對面就係桂林站~ 唔到咁都有3星.....


就係咁, 我地出去搵左桂林米粉食....

食完之後, 四周圍逛.... 逛到江邊, 見到有得行路過江, 好得意咁, 我地又去玩....

 
過左江之後就向原本要行既路進發, 但係行左好耐, 越行越唔對路, 問路, d人就指我地反方向行... 唔通我地張地圖係錯既??!!
(我地搞左半日之後, 先知自己因為貪得意過左條江, 所以d 路都要重新再locate.... 唔識路既人係咁架喇... 仲要係兩個唔識路... )

我地行左去象鼻公園... 要入場費... 好貴... 我地冇入, 諗住沿住佢附近行, 離遠睇下就算.... 點知... 佢都好串下, 全部種晒樹, 擋住晒... 佢好野!!! 最多咪唔睇??!!

知識產權局????!!!!!!!! 響大陸難以置信會見到.... 同埋唔知有佢既在....

搵台灣大老闆幫手plan 行程~

見行到咁上下, 都差唔多8點幾, 返去酒店沖個涼, 洗個面先~ 順便要plan 下行程... 我地總唔可以百無了賴咁日日無目的咁行黎行去架....

我地plan 左初步既行程之後, 就去見熱心既台灣大哥, 佢好熟陽朔桂林, 又好好人, 佢真係幫左我地唔少呀~ 我地兩個仲坐佢電單車尾去植物公園食lunch 同行左陣~ 佢又幫我地book 坐船遊漓江, 直車去龍脊梯田同住宿... etc... 佢真係好好人呀, 唔該晒大老闆~ heheee~

就係咁, 我地去左坐船遊漓江, 睇左好多唔同既山, 當然包括象鼻山啦~ 好彩冇俾錢入去0者....

呢條漓江有d似印度條恆河咁.... 佢地所有野都響度做... 沖涼, 洗衫, 游水, 釣魚... etc.... 勁!!!

呢兩個仲爽, 擔埋遮好似浸溫泉咁.... 堅呀!

遊完之後... 完全睇唔出點解桂林山水可以甲天下.... 好灰... 好彩我地都冇諗住久留, 第二朝就一早走....


行步行街

我地落左船之後, 就周圍行下.... 都唔知自己行左去邊... 見到有地方坐, 就hea 左陣... 我仲訓左陣.... 之後行下行下, 又行到返酒店附近....

仲未天黑, 搵d 地方行下啦.... 我地就去左步行街....

都幾多野行呀~ 同埋開價都唔離譜, ok 既~ 但係賣黎賣去都咁上下~ 我地見到有串燒, 就食左d~ 燒魚好好味呀~

之後行下行下, 都唔記得食晚飯.... 見夜就走喇... 是但兜左去漓江睇少少夜景就返歸... 因為之前一晚係車度, 訓得麻麻地... 第二朝一早又要早起身, 去睇梯田~